- Ramurs, pleds e musica
-
Il vial dal tun (numnà era soundtrack u film sonor) cumpiglia las ramurs, ils pleds e la musica d'in film. En la suandanta sequenza dal film «Die Nacht des Jägers» (USA, 1955) da Charles Laughton sa zuppan dus uffants en in clavà per fugir d'in um che vul mazzar els. Cun agiuntar al film in vial cun ramurs, dialogs e musica, reusseschi al reschissur da crear emoziuns fitg fermas tar ils aspectaturs. Ma co ha el fatg quai precisamain?
A l'entschatta da la sequenza sveglian musica armonica ed il chant d'utschels l'impressiun ch'ils uffants sajan en segirtad. Quests tuns calmants vegnan dentant interruts d'in giappim da chauns e d'ina chanzun d'uffants che l'assassin chantina. Ina chanzun fitg miaivla che ha gist perquai in effect inquietant e s'unescha cun l'urlim dals chauns. La chanzun creescha ina tensiun ch'ils maletgs sulets n'expriman insumma betg. Ins senta ina smanatscha vaga che vegn confermada tras la vusch interna dal mattatsch, entant che la musica daventa adina pli inquietanta.
Questa pitschna analisa mussa ch'il vial dal tun d'in film sa lascha separar facilmain en ramurs, pleds e musica, ch'ins na dastga dentant mai emblidar che quests trais elements furman in'unitad ed interageschan in cun l'auter e cun la musica.
Mintgatant è il vial dal tun cumponì a moda uschè perfetga ch'el communitgescha infurmaziuns ch'il maletg sulet na pudess betg dar a nus. Quai sa mussa fitg bain en questa sequenza dal film «There Will Be Blood» (USA, 2007) da Paul Thomas Anderson …
Il fatg ch'ins auda las ramurs l'emprim en in volumen normal e suenter mo pli da maniera supprimida, cun in lev ramurar, ans fa chapir ch'il mattatsch è daventà surd tras l'explosiun.
- Adina pli sonor
-
Dapi sia invenziun il 1895 fin a l'emprim film sonor il 1927 era il kino bain mit, ma las represchentaziuns eran savens tut auter che silenziusas. Per remplazzar la culissa da tuns mancanta vegnivan las represchentaziuns dals films adina accumpagnadas da musicists che sunavan gist en sala. Ils emprims onns da l'istorgia dal kino devi schizunt baterladers ch'eran engaschads aposta per commentar ils maletgs en sala, e ramuraders ch'eran zuppads davos la tenda u en las culissas e che faschevan là las ramurs correspundentas.
Cun guardar la suandanta sequenza dal film «The Kid» (USA, 1921) da Charlie Chaplin, er enconuschent sut il titel «Der Vagabund und das Kind», pon ins s'imaginar fitg bain tge eveniment che stueva esser ina represchentaziun en il temp dal film mit, cun musica e ramurs live en sala…
Cura che «The Kid» è arrivà il 1921 en ils kinos, na devi damai anc nagin vial dal tun. Pir cura ch'el è daventà sonor, ha Charlie Chaplin pudì agiuntar in vial dal tun – cun sia atgna musica e cun las ramurs da vaider che va en scalgias, creadas da ramuraders che na lavuravan betg pli davos las culissas, mabain en il studio.
A partir dal 1927 ha la tecnica permess da registrar il tun directamain sin il film e d'al sincronisar cun ils maletgs. Ils 6 d'october da quel onn ha gì lieu la premiera dal film sonor «Der Jazzsänger» (USA, 1927) dad Alan Crosland, probablamain l'emprim film sonor che ha emplenì l'entira saira.
Suenter l'entschatta, nua ch'ils acturs movan ils lefs senza ch'ins als auda, daventa questa sequenza tuttenina acustica: l'um chanta e discurra! L'arrivada dal film sonor è stada ina veritabla revoluziun. Dad oz a damaun han tut las salas da kino stuì endrizzar autpledaders e novs projecturs. Ma era las acturas ed ils acturs han stuì s'adattar: els han tuttenina stuì cumenzar a discurrer; els eran gea disads fin alura da giugar las emoziuns da lur figuras cun gests e mimica.
En la branscha da kino hai dà novas professiuns: l'assistent da tun, il maschadader, il tecnicist dal tun e natiralmain ils ramuraders che creavan da tuttas sorts ramurs, sco quai ch'ins auda fitg bain a la fin da questa sequenza dal film «Singin' in the Rain» (USA, 1952) da Stanley Donen e Gene Kelly…
Cura ch'il kino ha cumenzà a discurrer èsi era stà necessari da translatar ils dialogs dals films en autras linguas e d'als sincronisar e da render accessibels ad in public uschè vast sco pussaivel … Sco quai che Christian Frei declera a maun da las differentas versiuns linguisticas dal film «Heidi» dad Alain Gsponer, na vul quai betg mo dir da registrar da nov ils dialogs en ina lingua estra, resguardond ils moviments dals lefs, mabain era da crear da nov tut ils tuns ch'èn vegnids registrads il medem mument sco ils dialogs. Las ramurs dals pass, il tun da la vestgadira che smuschigna u il sun dal scalin – tut quests suns daventan nunduvrabels e ston vegnir refatgs d'in ramurader.
- Avant u suenter las lavurs da filmar?
-
I dat duas pussaivladads da registrar tuns e dialogs, cura ch'ins realisescha in film: u ch'ins als registrescha directamain durant ch'ins filmescha u ch'ins als agiunta pli tard, cun la musica, cura ch'ins fa la postsincronisaziun.
Il pli savens registresch'ins dentant il tun durant filmar e cumplettescha el durant la postsincronisaziun. Sincronisar ils tuns ed ils maletgs è ina lavur fitg pretensiusa: cura ch'insatgi chamina, ston ins udir la ramur da ses chalzer gist il mument ch'il chalzer tutga il palantschieu.
Malgrà che la gronda part dals cineasts lavura en questa moda, datti er auters che fan l'entira postsincronisaziun da lur films pir cura che las lavurs da filmar èn terminadas: ils acturs ed ils ramuraders registreschan da nov en il studio l'entir vial dal tun. Surtut Jacques Tati fascheva quai uschia, sco che Christian Frei ha mussà. Fellini, in auter grond cineast, pretendeva schizunt da ses acturs ch'els discurrian mo silbas senza senn durant la filmada, sco en il film «Die Clowns», dal qual deriva questa sequenza:
Sche las ramurs vegnan registradas il medem mument sco ils dialogs dals acturs, discurr'ins dal tun direct. Fellini na lavurava betg uschia. Sch'igl ha memia bleras ramurs disturbantas durant ch'ins filmescha, registrescha il tecnicist dal tun era tuns singuls che vegnan agiuntads pli tard al vial dal tun, il mument ch'ins fa la postsincronisaziun. I po sa tractar da ramurs fitg specificas, sco quellas d'in tschitschapulvra, ma era da ramurs dal conturn, sco canera dal traffic.
Mintgatant emblida il tecnicist dal tun da registrar in tun singul u ch'il reschissur è da l'opiniun ch'in tschert tun na saja betg expressiv avunda u n'haja betg la qualitad spetgada. Natiralmain po la tecnicista u il tecnicist dal tun simplamain tschertgar in tun correspundent en ina banca da datas sonoras, ma la reschissura u il reschissur preferescha probablamain d'engaschar in ramurader per survegnir il meglier resultat pussaivel. Sch'i sa tracta d'in tun imaginar, èsi anc pli impurtant d'avair l'agid d'in ramurader. Co fissi auter pussaivel da far udir la ramur d'in extraterrester u d'in ufo che da l'inventar cumplettamain da nov!
Ussa suonda ina sequenza dal film «Der Dialog» (USA, 1974) da Francis Ford Coppola, nua che las ramurs ed il soundtrack giogan ina rolla fitg impurtanta. Sa tracti qua da tuns directs, tuns singuls u ramurs?
En questa sequenza n'hai senza dubi gnanc in sulet tun ch'è vegnì registrà directamain durant las lavurs da filmar. I sa tracta damai da tuns agiuntads tuts suenter la filmada, saja quai la canera da la via u las ramurs da l'apparat da registraziun.
A maun da l'exempel da ses agen film documentar «Space Tourists» (2009), mussa Christian Frei a moda impressiunanta la differenza tranter il tun direct ed il tun agiuntà pli tard cun agid da la postsincronisaziun. Il cineast declera surtut, pertge ch'el ha stuì far diever da la postsincronisaziun per agiuntar ramurs a la scena, nua che la milliardaria Anousheh Ansari che viagia en ina nav spaziala lava ils dents.
Guardain ussa la suandanta sequenza dal film «2001: Odyssee im Weltraum» (USA, 1968) da Stanley Kubrick: sa tracti d'in tun direct u d'in tun postsincronisà?
Cuntrari al film documentar «Space Tourists» n'è quest astronaut betg vegnì filmà en il cosmos, mabain en in studio cun agid da differentas registraziuns da tric. Las ramurs da respiraziun da l'astronaut èn damai vegnidas postsincronisadas. I sa tracta d'in tun subjectiv, perquai ch'ins al percepescha sco sch'ins fiss sez en il plaz da la persuna, en il vestgì d'astronaut. Igl è d'accentuar qua l'impurtanza essenziala da questa ramur: en cumbinaziun cun ils maletgs reusseschi ad ella d'intermediar ch'il cosmos è in lieu totalmain silenzius, cuntrari a quai che fan apparair las explosiuns cuntinuadas en il film «Krieg der Sterne».
Questas sequenzas mussan che las ramurs en films da science fiction èn per il solit postsincronisadas; cuntrari als films documentars, nua che las cineastas ed ils cineasts lavuran en general cun il tun direct per accentuar la realitad ch'els vulan represchentar. Ma i succeda era ch'ils realisaturs da films documentars agiuntan ramurs, perquai ch'in tun manca, na va betg a prà u n'è betg expressiv avunda.
- Pli ferm ch'il maletg?
-
Per regla s'integrescha il tun uschè bain en ils maletgs ch'ins na fa gnanc stim dad el e ch'ins n'al percepescha betg sco tal. Christian Frei explitgescha dentant a maun dal film «Playtime», in exempel satiric da Jacques Tati, ch'i po dar situaziuns, nua ch'il tun daventa uschè impurtant ch'el dictescha schizunt il ritmus dals maletgs.
Co pon ins definir ils tuns en la suandanta sequenza dal film «Dancer in the Dark» (Danemarc, 2000) da Lars von Trier? Sa tracti da ramurs u da musica?
Da tuts dus! Ils tuns vegnan effectivamain realisads en furma da canera da maschinas, fin ch'els chaschunan in ritmus che transfurma els la finala successivamain en musica. Questa musica animescha la lavurera da sautar e chantar, sco en in musical.
Quest gener da transfurmaziun è tipic per musicals, nua ch'in tun realistic sa mida plaun a plaun en musica. Sco sch'ils acturs sentissan questa midada, bandunan els lur activitad ed interrumpan per in mument l'istorgia per cumenzar a chantar e sautar.
La suandanta sequenza dal film «Der Diktator» (USA, 1940) da Charlie Chaplin è in exempel extrem per mussar co che la musica po prender possess dal maletg cun determinar la scena cun ses ritmus.
Tar il toc musical fitg enconuschent da l'opera «Der Barbier von Sevilla» da Rossini fa Charlie Chaplin la barba ad in client. Ses gests èn coordinads precisamain cun la musica. Questa tecnica numn'ins «mickeymousing», perquai ch'ella è cumparida l'emprima giada en l'istorgia dal kino en in film da dissegns animads sonor davart Mickey Mouse, realisà da Walt Disney l'onn 1928. Il «mickeymousing» vegn duvrà savens per dar ina dimensiun comica ad ina scena.
Tuttina po era la lingua vegnir duvrada sco ramur, sco quai che mussa la suandanta sequenza dal film «Mädchenbande» (Frantscha 2014) da Céline Sciamma.
En questa scena èn ils discurs da las mattatschas l'emprim nunchapibels e furman ina massa sonora allegra e canerusa. Tuttenina vegn questa canera interrutta d'in silenzi fitg perceptibel: las mattatschas taschan, perquai ch'ellas passan sper ils mattatschs dal quartier vi. Grazia a quest effect sonor chapescha l'aspectatur immediat che las mattatschas na sa sentan betg bain en preschientscha dals mattatschs che sa cumportan en il film sco machos.
- Davart Christian Frei
-
Christian Frei è vegnì nominà il 2001 per l'Oscar cun «War Photographer», in film documentar davart in fotograf da guerra. Sia carriera sco cineast al maina per l'entir mund enturn.
Christian Frei ha realisà numerus films documentars, tranter auter «The Giant Buddhas» (2005) davart la destrucziun da las statuas da Buda giganticas entras ils Talibans en l'Afganistan, «Space Tourists» (2009) davart il turissem en il cosmos u era «Genesis 2.0» (2018) davart la «chatscha» da mamuts, dals quals ils skelets eran enserrads en la schelira permanenta da la Sibiria e ch'èn vegnids a la glisch tras il stgaudament climatic.
En tut ses films dat Christian Frei in'attenziun particulara al tun, sco quai che mussa sia pitschna lecziun da kino deditgada a las ramurs («Heidi beim Geräuschemacher», Kleine Kinoschule).
